Ky Serial rrëfen jetën e një grupi studentësh, që banojnë në lagjen e njohur të kryeqytetit, si dhe problemet e tyre. Regjia e këtij prodhimi mban firmën e Altin Bashës, i mirënjohur për publikun si regjisor i spektaklit “Portokalli”, si dhe skenografinë e Mikail Dritës. “Komuna e Parisit”, skenari i të cilit vjen nga Erand Sojli, sjell historinë e gjashtë të rinjve, tri vajza dhe tre djem, të cilët studiojnë, por edhe punojnë njëkohësisht. Ata jetojnë në apartamente me qira në të njëjtin pallat. E gjithë historia, mbi bazën e së cilës janë ndërtuar 20 seri, vërtitet rreth marrëdhënies së tyre të përditshme, nevojat sociale dhe problemet që rrjedhin nga marrëdhëniet mes tyre, por edhe më gjerë me komunitetin ku jetojnë. Në këtë serial, ku nuk do të mungojnë edhe fenomenet sociale që ndeshen shpesh në komunitete të tilla ku ndërthuren mentalitete e karaktere të ndryshme, por as situatat komike. Por, ashtu siç edhe ka deklaruar më parë drejtori i prodhimit, Dritan Huqi, nuk kemi të bëjmë me një komedi, por me një format rinor, për të cilin “Top Channel” është kujdesur në çdo detaj, përfshi këtu edhe parametrat më të larta të teknologjisë. Kostumet janë realizuar nga Iliriana Basha, drejtor i fotografisë është Valter Qarri dhe regjisor televiziv, Elton Papuçiu. “Ajo që e bën tipik shqiptar këtë realizim janë tematikat dhe karakteret që nuk lidhen aspak me influencat e varianteve të ndryshme të huaja. Personazhet janë të rinj shqiptarë të përditshëm, që diskutojnë për gjëra mjaft të njohura për ne, duke filluar nga problemet më të rënda sociale e deri tek ato më të rëndomtat e jetës në komunitet, të bashkëjetesës në pallate të mëdha që ndërtohen me shumicë në kohërat e sotme moderne. Jo rastësisht, kjo telenovelë është titulluar ‘Komuna e Parisit‘. Kjo zonë e Tiranës njihet për ndërtimet e shumta, ku ka një përqendrim të madh njerëzish, në një sipërfaqe shumë të vogël”, ka deklaruar pak kohë më parë regjisori Altin Basha. Për vijimësinë e serialit përtej 20 serive të para, Basha ka thënë se stafi organizator do të reagojë në bazë të perceptimit të publikut, “sepse është ai që vendos për kualitetin e produktit që ne i servirim”. Megjithatë, përtej reagimit të publikut ndaj këtij formati të ri që “Top Channel” u propozon, organizatorët mendojnë se do të krijohet e gjithë infrastruktura e nevojshme që ky serial televiziv të vazhdojë e të krijojë një audiencë të tijën të përhershme.

Vendoseni kte artikull :